(ភ្នំពេញ)៖ នាល្ងាចថ្ងៃចន្ទ ទី៧ ខែមេសា ឆ្នាំ២០២៥ នៅសណ្ឋាគារ Fairfield by Marriott ភ្នំពេញ ឯកឧត្តម ឱក ប៊ុង រដ្ឋលេខាធិការក្រសួងពាណិជ្ជកម្ម បានអញ្ជើញចូលរួមពិធីជប់លៀងអាហារពេលល្ងាច (Gala dinner) ដែលរៀបចំឡើងដោយ ស្ថានទូតឥណ្ឌាប្រចាំនៅព្រះរាជាណាចក្រកម្ពុជា សហការជាមួយរដ្ឋាភិបាលនៃរដ្ឋតាមិល នៃសាធារណរដ្ឋឥណ្ឌា និងសហព័ន្ធឧស្សាហកម្មឥណ្ឌា។

កម្មវិធីនេះ មានការអញ្ជើញចូលរួមពីឯកឧត្តម បាវីតលុង វ៉ាន់ឡាល់វ៉ាវណា (Bawitlung Vanlalvawna) ឯកអគ្គរដ្ឋទូតសាធារណរដ្ឋឥណ្ឌាប្រចាំព្រះរាជាណាចក្រកម្ពុជា លោកស្រី អា ឡាលីថា អាយអេអេស (R. Lalitha IAS) នាយកផ្នែកវាយនភណ្ឌរបស់រដ្ឋាភិបាលនៃរដ្ឋតាមិល នៃសាធារណរដ្ឋឥណ្ឌានិងគណៈប្រតិភូ តំណាងសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា(TAFTAC) និងតំណាងសមាគមស្បែកជើងកម្ពុជា(CFA) ព្រមទាំងភ្ញៀវកិត្តិយសជាច្រើនរូប។

កម្មវិធីនេះរៀបចំឡើងក្នុងគោលបំណងដើម្បីតភ្ជាប់ទំនាក់ទំនងរវាងអ្នកលក់-អ្នកទិញផ្នែកវាយនភណ្ឌកម្ពុជានិងឥណ្ឌា និងដើម្បីជំរុញពាណិជ្ជកម្មទ្វេភាគីកម្ពុជានិងឥណ្ឌាឱ្យកាន់តែប្រសើរឡើងថែមទៀត។

ក្នុងឱកាសនោះ ឯកឧត្តមរដ្ឋលេខាធិការ បានលើកឡើងអំពីការរៀបចំ និងអនុវត្តយុទ្ធសាស្ត្រមួយចំនួនរបស់ក្រសួងពាណិជ្ជកម្មក្នុងការធ្វើពិពិធកម្មទីផ្សារ និងបង្កើនភាពប្រកួតប្រជែង ការពង្រីកមូលដ្ឋានផលិតកម្ម ការបង្កើនតម្លៃបន្ថែម ការតភ្ជាប់ខ្សែច្រវាក់តម្លៃនិងផ្គត់ផ្គង់សកល ពង្រឹងកិច្ចសម្រួលពាណិជ្ជកម្ម ព្រមទាំងការបង្កើនភាពទាក់ទាញវិនិយោគក្នុងឧស្សាហកម្មថ្មីៗ ដែលជាមូលដ្ឋាននៃការគាំទ្រកំណើនប្រកបដោយចីរភាពនិងភាពធន់៕