(ភ្នំពេញ) នារសៀលថ្ងៃទី ២៦ ខែតុលា ឆ្នាំ២០២៣ ឯកឧត្តម ផាន អូន ប្រតិភូរាជរដ្ឋាភិបានកម្ពុជាទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប. បានទទួលជួបក្រុមការងារនៃសមាគម Asia Pacific International Spirits and Wines Alliance (APISWA) ដើម្បីពិភាក្សាលើការពិនិត្យលទ្ធភាពរៀបចំឱ្យមានក្រមអនុវត្តក្នុងការផ្សាយពាណិជ្ជកម្មផលិតផលគ្រឿងស្រវឹង [Self-Regulatory Responsible Marketing Code for Alcoholic Beverages] និងពិភាក្សាលើវឌ្ឍនភាពនៃសេចក្តីព្រាងអនុក្រឹត្យស្តីពីការកំណត់អាយុស្របច្បាប់ក្នុងការទិញភេសជ្ជៈគ្រឿងស្រវឹងក្នុងព្រះរាជាណាចក្រកម្ពុជា។គោលបំណងនៃកិច្ចប្រជុំនាថ្ងៃនេះ គឺសមាគម APISWA ស្នើសុំការគាំទ្រជាគោលការណ៍ក្នុងការរៀបចំក្រមអនុវត្តក្នុងការផ្សាយពាណិជ្ជកម្មផលិតផលគ្រឿងស្រវឹង ដែលនឹងដើរជាគោលការណ៍សំខាន់មួយសម្រាប់ធុរជនផ្នែកភេសជ្ជៈគ្រឿងស្រវឹងជាតិ និងអន្តរជាតិ ទទួលប្រតិបត្តិតាមនៅពេលដែលធ្វើការផ្សាយពាណិជ្ជកម្មផលិតផលរបស់ខ្លួន។គួររំលឹកផងដែរថាសមាគម APISWA មានសមាជិកជាក្រុមហ៊ុនធំៗចំនួន ៣ ដែលកំពុងធ្វើប្រតិបត្តិការអាជីវកម្មរបស់ខ្លួនក្នុងព្រះរាជាណាចក្រកម្ពុជា ដូចជា Heineken, Carlsberg និង Pernod Ricard ហើយក្រុមហ៊ុនទាំង ៣ នេះ ក៏បានដើរតួយ៉ាងសំខាន់ក្នុងការជម្រុញឱ្យមានការកំណត់អាយុស្របច្បាប់ក្នុងការទិញភេសជ្ជៈគ្រឿងស្រវឹងក្នុងព្រះរាជាណាចក្រកម្ពុជាផងដែរ៕