បន្ទាប់មក គណៈប្រតិភូក្រសួងពាណិជ្ជកម្ម ជួបសម្តែងការគួរសម និងពិភាក្សាការងារទ្វេភាគីជាមួយលោក លាវ ចឺហុង លេខាបក្សក្រុង យុនឆឹង ខេត្តសាន់ស៊ី ដោយក្នុងជំនួបនេះ ឯកឧត្តម សំ សិរីរតន៍ បានលើកឡើងពីកាលានុវត្តភាព សក្តានុពលវិនិយោគ វឌ្ឍនភាពនៃកំណើនសេដ្ឋកិច្ចជាតិ និងគោលនយោបាយលើកទឹកចិត្តរបស់រដ្ឋាភិបាលកម្ពុជា ដើម្បីទាក់ទាញវិនិយោគផ្ទាល់ពីបរទេស ជាពិសេស គឺការវិនិយោគលើវិស័យកសិកម្ម ដូចជាការកែច្នៃកសិផលទៅជាផលិតផលសម្រេចផ្សេងៗ ដើម្បីបំពេញតម្រូវការទីផ្សារក្នុងស្រុកផង និងជំរុញការនាំចេញទៅទីផ្សារអន្តរជាតិផង ខណៈដែលកម្ពុជា នៅតែមានឧត្តមភាព និងភាពអនុគ្រោះពាណិជ្ជកម្មនៅឡើយ។ ជាមួយគ្នានេះដែរ ឯកឧត្តម បានស្នើភាគីចិន ជួយជំរុញការផ្លាស់ប្តូរពាណិជ្ជកម្មលើផលិតផលកសិកម្ម ជាពិសេសរវាងផ្លែប៉ោម ក្រុងយុនឆឹង និងផលិតផលកសិកម្មកម្ពុជា។

ជាការឆ្លើយតបលោក លាវ ចឺហុង បានមានប្រសាសន៍ថា លោកគាំទ្រតាមសំណើរបស់ឯកឧត្តម​ប្រធានគណៈប្រតិភូកម្ពុជា ភាគីចិន មានគម្រោងនឹងដឹកនាំគណៈប្រតិភូពាណិជ្វកម្ម ធុរជន និងវិនិយោគគិន ខេត្តសាន់ស៊ី អញ្ជើញទៅទស្សនកិច្ចនៅកម្ពុជា នៅឆ្នាំក្រោយ។

នៅក្នុងកិច្ចពិភាក្សានេះ ភាគីទាំងពីរ បានជំរុញឱ្យមានការផ្លាស់ប្តូរបេសកកម្មពាណិជ្ជកម្មទៅវិញទៅមក រវាងប្រទេសកម្ពុជា និងខេត្តសាន់ស៊ី ដើម្បីជំរុញឱ្យពាណិជ្ជករ និងអ្នកវិនិយោគ មានទំនាក់ទំនងដោយផ្ទាល់ និងមានឱកាសបានចាប់ដៃគូពាណិជ្ជកម្មលើវិស័យកសិកម្មផងដែរ។

អត្ថបទ និងរូបភាព៖ នាយកដ្ឋានអភិវឌ្ឍន៍ទីផ្សារ